రంపచోడవరం: ఏజెన్సీలో కొత్తగా రబ్బరు తోటలు వేసే రైతులను గుర్తించి, వారిని అన్నిరకాలుగా ప్రోత్సహిస్తామని ఐటీడీఏ ప్రాజెక్టు అధికారి సూరజ్‌ గనోరే తెలిపారు. స్థానిక ఐటీడీఏ కార్యాలయంలో మంగళవారం కొత్త రబ్బర్‌ ప్లాంటేషన్‌ రైతుల గుర్తింపు, అందించాల్సిన ప్రోత్సాహంపై నిర్వహించిన సమావేశంలో ఆయన మాట్లాడారు. మారేడుమిల్లి, వై.రామవరం మండలం ఎగువ ప్రాంతం, రంపచోడవరం మండలాల్లోని గ్రామాలలో కొత్త రబ్బర్‌ ప్లాంటేషన్‌ వేసుకునే రైతులకు ప్రోత్సాహం అందిస్తామని తెలిపారు. ఉపాధి హామీ పథకం పీవోలు, హార్టీకల్చర్‌ అసిస్టెంట్లు, అగ్రికల్చర్‌ అసిస్టెంట్లు, రబ్బర్‌ బోర్డు అధికారులు కలిసి కొత్తగా రబ్బరు సాగు చేసే రైతులను గుర్తించాలని సూచించారు. వారం రోజులలో రైతులను గుర్తించి నివేదిక సమర్పించాలని ఆదేశించారు.ప్రస్తుతం 1,250 ఎకరాలలో ఉపాధి హామీ పథకం ద్వారా రబ్బర్‌ ప్లాంటేషన్‌ జరుగుతోందన్నారు. ఎకరాకు సుమారు 200ల మొక్కలు ఇస్తారన్నారు. వీటిని రైతులు మూడేళ్లపాటు పెంచుకునేందుకు రూ.1.64 లక్షలు ఉపాధి హామీ పథకం ద్వారా, రబ్బర్‌ బోర్డు ద్వారా రూ.14,400లు ఇస్తారన్నారు. మొత్తం రూ.1.75 లక్షలు మూడేళ్లకు చెల్లింపు జరుగుతుందని పీవో తెలిపారు. రబ్బరు రైతులు కంచెలు ఏర్పాటు చేసుకోవడం, మొక్కలకు నీళ్లు పోయడం, ఎరువులు వేయడం, రైతువారి ప్లాంటేషన్‌ పనులు చేసేందుకు ఉపాధి పనుల ద్వారా కూలీలకు నిధులు చెల్లింపు జరుగుతుందన్నారు. రబ్బర్‌ చెట్లు పెంచేందుకు భూమి అనువుగా ఉన్నదీ లేనిదీ గుర్తించాలని, నీటి సదుపాయం ఉన్నదీ లేనిదీ చూడాలని సూచించారు. రబ్బర్‌ ప్లాంటేషన్‌ చేసే రైతులకు ఐదు ఎకరాల లోపు భూమి ఉండాలని, అటువంటి వారు మాత్రమే అర్హులని స్పష్టం చేశారు. ఈ కార్యక్రమంలో పీహెచ్‌వో చిట్టిబాబు, ఉపాధి హామీ పథకం పీడీ జి.శ్రీనివాస్‌, పీఏవో జి.రాంబాబు, రబ్బర్‌ బోర్డు ఏడీవో శరత్‌ చంద్‌, ఏడీఏ సిహెచ్‌.కె.వి.చౌదరి పాల్గొన్నారు. మొక్కల పెంపకానికి ఉపాధి హామీ నిధులు రంపచోడవరం ఐటీడీఏ పీవో సూరజ్‌గనోరే

రంపచోడవరం: వచ్చేనెల నాలుగో తేదీన జరిగే ఓట్ల లెక్కింపునకు పటిష్ట భద్రత చర్యలు తీసుకుంటున్నామని రంపచోడవరం అసెంబ్లీ నియోజకవర్గ రిటర్నింగ్‌ అధికారి ప్రశాంత్‌ కుమార్‌ పేర్కొన్నారు. స్థానిక ఐటీడీఏ సమావేశ మందిరంలో మంగళవారం ఎన్నికలలో పోటీ చేసిన అభ్యర్థులు, వివిధ రాజకీయ పార్టీలకు సంబంధించిన ప్రతినిధులతో ఓట్ల లెక్కింపుపై ఏఎస్పీ జగదీష్‌ అడహళ్లితో కలిసి సమావేశం నిర్వహించారు. ఈ సందర్భంగా ఆర్వో మాట్లాడుతూ ప్రస్తుతం స్ట్రాంగ్‌ రూమ్‌కు 24 గంటల భద్రత ఏర్పాటు చేసినట్టు తెలిపారు. వచ్చేనెల నాలుగో తేదీన కౌంటింగ్‌ జరిగే కేంద్రం దగ్గరకు ఎవ్వరూ రాకూడదని ఆయన తెలిపారు. ఈ విషయం అభ్యర్థులకు సంబంధించిన ప్రతినిధులు, అభిమానులకు ఫోన్‌ మెసేజ్‌ ద్వారా తెలియజేయాలని ఆయన సూచించారు. ఏఎస్పీ మాట్లాడుతూ ఓట్ల లెక్కింపు కేంద్రం దగ్గర 144 సెక్షన్‌ అమల్లో ఉంటుందని ఎవరైనా అతిక్రమిస్తే చర్యలు తీసుకుంటామని హెచ్చరించారు. అరకు అసెంబ్లీకి.. పాడేరు : స్థానిక ప్రభుత్వ డిగ్రీ కళాశాలలో వచ్చేనెల నాలుగో తేదీన జరిగే ఓట్ల లెక్కింపునకు పటిష్ట భద్రత ఏర్పాట్లు చేయాలని అరకు అసెంబ్లీ ఆర్వో అభిషేక్‌ ఆదేశించారు. అరకు అసెంబ్లీ పరిధిలోని తహసీల్దార్లు, డిప్యూటీ తహసీల్దార్లతో మంగళవారం ప్రభుత్వ డిగ్రీ కళాశాలలో సమావేశం నిర్వహించారు. ఓట్ల లెక్కింపు నిర్వహణ, స్ట్రాంగ్‌ రూం నుంచి కౌటింగ్‌ హాలుకు ఈవీఎంల తరలింపుపై అధికారులకు అవగాహన కల్పించారు. కౌంటింగ్‌ హాలులో ఈవీఎంలకు 14 టేబుళ్లు, పోస్టల్‌ బ్యాలెట్ల కోసం మరో మూడు టేబుళ్లను ఏర్పాటు చేయాలన్నారు. ఎటువంటి పొరపాట్లకు తావులేకుండా ఓట్ల లెక్కింపు సజావుగా జరిగేలా చూడాలన్నారు. ప్రతి కౌటింగ్‌ టేబుల్‌ వద్ద సహాయ రిటర్నింగ్‌ అధికారి, సూపర్‌ వైజర్‌, మరోక సహాయకులు ఉండాలని ఆదేశించారు. అనంతరం ఆయన ఈవీఎంలు భద్రపరిచిన స్ట్రాంగ్‌ రూం సీళ్లను పరిశీలించారు. ఈ కార్యక్రమంలో ఎస్‌డీసీ శర్మ తదితరులు పాల్గొన్నారు.

సాక్షి, పాడేరు: జిల్లాలోని టెన్త్‌, ఓపెన్‌ టెన్త్‌, ఇంటర్‌ సప్లిమెంటరీ పరీక్షలను పకడ్బందీగా నిర్వహించాలని జిల్లా రెవెన్యూ అధికారి బి.పద్మావతి ఆదేశించారు.సప్లిమెంటరీ పరీక్షలకు సంబంధించి అధికారులతో మంగళవారం నిర్వహించిన సమావేశంలో ఆమె పలు సూచనలు చేశారు. ఈనెల 24నుంచి వచ్చేనెల 3వతేది వరకు టెన్త్‌ సప్లిమెంటరీ పరీక్షలు జరుగుతాయన్నారు. ఉదయం 9.30గంటల నుంచి మధ్యాహ్నం 12.45గంటల వరకు జరిగే పరీక్షలకు సంభందించి జిల్లాలో 1530 మంది విద్యార్థులు హాజరవుతారని ఆమె తెలిపారు. వీటి నిర్వహణకు ఏడు పరీక్షా కేంద్రాల్లో తాగునీరు, విద్యుత్‌, రవాణా, ఇతర మౌలిక సదుపాయాలను అందుబాటులో ఉంచాలని సూచించారు.అన్ని పరీక్షా కేంద్రాల వద్ద 144 సెక్షన్‌ అమలుచేయాలని ఆదేశించారు. ఓపెన్‌ టెన్త్‌, ఇంటర్‌ పరీక్షలను కూడా ప్రశాంతంగా నిర్వహించాలని సూచించారు. జిల్లా వ్యాప్తంగా 424 మంది టెన్త్‌, 321మంది ఓపెన్‌ ఇంటర్‌ పరీక్షలు రాయనున్నారని, మధ్యాహ్నం 2.30 నుంచి సాయంత్రం 5గంటల వరకు పరీక్షలు జరుగుతాయన్నారు.వచ్చేనెల 10నుంచి 12వతేదీ వరకు ఇంటర్‌ ప్రాక్టికల్‌ పబ్లిక్‌ పరీక్షలు జరుగుతాయని తెలిపారు. ఈ సమావేశంలో డీఈవో బ్రహ్మజీరావు, స్కూల్‌ ఎడ్యుకేషన్‌ అసిస్టెంట్‌ కమిషనర్‌ ఆర్‌.శశికుమార్‌, పోలీసు, ఆర్టీసీ, వైద్యశాఖ, రవాణా,విద్యుత్‌ శాఖల అఽధికారులు పాల్గొన్నారు. డీఆర్వో పద్మావతి అధికారులతో సమీక్ష

పెదబయలు: ఓట్ల లెక్కింపు పూర్తయి ఫలితాలు వెల్లడయ్యేవరకు అనునిత్యం అప్రమత్తంగా ఉండాలని ఎస్పీ తుహిన్‌ సిన్హా ఆదేశించారు. మంగళవారం స్థానిక పోలీసు స్టేషన్‌ను ఆయన ఆకస్మికంగా తనిఖీ చేశారు. ఆయన శాంతి భద్రత వివరాలు అడిగి తెలుసుకున్నారు. స్టేషన్‌లో సదుపాయాలను పరిశీలించారు. అలాగే స్టేషన్‌ ఆవరణలో అదనపు భవనాల నిర్మాణాలను పరిశీలించారు. ఎన్నికల కౌంటింగ్‌ పూర్తి అయ్యేంత వరకు అప్రమత్తంగా ఉండాలని సూచించారు. సార్వత్రిక ఎన్నికల పోలింగ్‌ మారుమూల ప్రాంతాల్లో ప్రశాంతంగా నిర్వహించేందుకు కృషి చేసిన ఎస్‌ఐ, సీఐలు, సిబ్బందిని ఆయన అభినందించారు.అలాగే జూన్‌ నాలుగో తేదీ ఓట్ల లెక్కింపు ఫలితాల వరకు అప్రమత్తంగా ఉండాలని ఆదేశించారు. అలాగే దుకాణాల్లో బాటిళ్లల్లో పెట్రోల్‌ విక్రయాలు జరగకుండా జాగ్రత్తలు తీసుకోవాలని సూచించారు. అలాగే ఒడిశా సరిహద్దు ప్రాంతాల నుంచి గంజాయి రవాణాను అరికట్టాలని, మావోయిస్టుల కదలికలపై అప్రమత్తంగా ఉండాలని సూచించారు. జి.మాడుగుల సీఐ రమేష్‌, ఎస్‌ఐ పి.మనోజ్‌కుమార్‌ పాల్గొన్నారు. ఎస్పీ తుహిన్‌ సిన్హా

సింహాచలం (విశాఖ) : సింహగిరిపై శ్రీ వరాహ లక్ష్మీనృసింహస్వామి ఆలయంలో బుధవారం, గురువారం ఆర్జిత సేవలన్నీ రద్దు చేసినట్టు సింహాచలం దేవస్థానం ఏఈవో ఎన్‌. ఆనంద్‌కుమార్‌ మంగళవారం తెలిపారు. 22న శ్రీనృసింహ జయంతి, స్వాతి నక్షత్ర హోమం నిర్వహిస్తున్న కారణంగా ఆర్జిత సేవలన్నీ రద్దు చేసినట్టు తెలిపారు. అలాగే వైశాఖ పౌర్ణమి కావడంతో గురువారం కూడా ఆర్జిత సేవలన్నీ రద్దు చేసినట్టు పేర్కొన్నారు. నమళ్వార్‌ తిరునక్షత్రం సందర్భంగా గురువారం రాత్రి 7గంటల వరకు మాత్రమే దర్శనాలు లభిస్తాయని తెలిపారు. భక్తులంతా ఈ విషయాలను గమనించాలని కోరారు. నేడు కృష్ణాపురంలోని గోశాలలో శ్రీనృసింహ జయంతి శ్రీ నృసింహ జయంతిని బుధవారం సింహాచలం దేవస్థానానికి చెందిన శ్రీకృష్ణాపురంలోని గోశాలలో విశేషంగా నిర్వహిస్తున్నట్టు సింహాచలం దేవస్థానం ఈవో ఎస్‌.శ్రీనివాసమూర్తి తెలిపారు. సాయంత్రం 4గంటల నుంచి గోశాలలో ఉన్న భారీ నృసింహుడి విగ్రహం వద్ద ఈకార్యక్రమాన్ని నిర్వహిస్తున్నట్టు తెలిపారు. భక్తులంతా ఈకార్యక్రమాల్లో పాల్గొనాలని ఆయన కోరారు.