దాంపత్య సుధలివి

ఇన్ఫోసిస్‌ ఫౌండేషన్‌ చైర్‌పర్సన్‌ సుధామూర్తి బిలియనీర్‌ మాత్రమే కాదు, చక్కటి కుటుంబ నిర్మాత కూడా. చదవడం, రాయడం పట్ల ఆమెకున్న మక్కువతో పాటు, ఇంటి అవసరాలు తీర్చడం, పిల్లలను పెంచడం, భర్త నారాయణ మూర్తికి సహకారం ఇవ్వడం వంటి వాటితో వృత్తిని, కుటుంబ జీవితాన్ని బాగా బ్యాలెన్స్‌ చేసుకున్నారు. వృత్తి జీవితంలో ఎంతో బిజీగా ఉన్నప్పటికీ, కంప్లైంట్స్‌ లేకుండా కుటుంబం చక్కగా స్థిరపడేలా జాగ్రత్తలు తీసుకున్నారు. దాంపత్య జీవితం విజయవంతమవ్వాలంటే భాగస్వాములు ఎలా ఉండాలో నాలుగు పదుల వైవాహిక జీవితం నుంచి ఆమె చెప్పిన ముఖ్యమైన విషయాలతో దాంపత్య సుధలివి!

వివాహం బ్యాలెన్స్ షీట్‌ కాదు
సమానత్వం ఆరోగ్యకరమైన సంబంధంలో కీలకమైన అంశం. అయితే, కొంతమంది జంటలు వివాహాన్ని ఒక ఒప్పందంగా భావిస్తారు. ప్రతి చర్యను ఫిఫ్టీ–ఫిఫ్టీ ప్రాతిపదికన జాగ్రత్తగా లెక్కిస్తారు. కఠినంగా ఉండే ఇలాంటి మనస్తత్వ సంబంధం సహజత్వాన్ని దెబ్బతీస్తుంది. అది ఒకరి బాధ్యతలను ఒకరు అర్థం చేసుకోవడం, ప్రేమగా నెరవేర్చడంలో చూపించాలి కానీ, కఠినమైన సమానత్వాన్ని కొనసాగించడంలో కాదు.

వివాహంలో పోటీ వద్దు
వివాహం అనేది ఇరు వ్యక్తుల ఏకత్వం కోసం. అంతేకానీ, యుద్ధభూమిగా ఉండకూడదు. భాగస్వాముల మధ్య  పోటీ, సంఘర్షణ, ఆగ్రహానికి దారితీస్తుంది. జీవితం అభివృద్ధి చెందుతున్న కొద్దీ, జంట కూడా మారుతున్న పరిస్థితులకు అనుగుణంగా మారాలి. ఒకరి ప్రాధాన్యతలను మరొకరు గౌరవించుకోవాలి. ఇద్దరూ కలిసి సాధించాల్సిన విజయం కాబట్టి ఎవరు గొ΄్పో తేల్చుకోనక్కరలేదు.  

భాగస్వామ్య లక్ష్యాలు సంబంధాలను బలోపేతం చేస్తాయి
ప్రతి జంట తమ కుటుంబ లక్ష్యాల కోసం కలిసి పనిచేయాలి. వారు ఏం సాధించాలనుకుంటున్నారు, తమ భవిష్యత్తును ఎలా ఊహించుకుంటున్నారు... అనేవి ఇద్దరి మధ్య స్వేచ్ఛగా, నిజాయితీగా అబీప్రాయాలను వ్యక్తపరచగల వాతావరణం ఉండాలి. అప్పుడే ఆ సంబంధంలో పరస్పర గౌరవం ఏర్పడి, బంధం మధ్య స్పష్టతను పెంచుతుంది.

సమస్యలను విస్మరించవద్దు
వివాహ బంధంలో సమస్యలు వస్తున్నప్పుడు వాటిని సాధ్యమైనంత త్వరగా పరిష్కరించుకోవాలి. అదే సమయంలో సమస్య మరింత కఠినంగా మారకుండా చూసుకోవడమూ ముఖ్యమే. సరిచేయడానికి భాగస్వాములిద్దరూ చొరవ తీసుకోవాలి. కౌన్సెలింగ్‌ తీసుకోవడాన్ని ఎప్పుడూ చిన్నచూపుగానో, బలహీనతగానో చూడకూడదు. తమ బంధాన్ని నిలుపుకునేందుకు, నిబద్ధతకు సంకేతం కూడా. కొన్నిసార్లు బయటకు చెప్పని భావోద్వేగాలను నిపుణుల సహాయంతో వెలిబుచ్చడం వల్ల దంపతుల మధ్య స్పష్టతకు వీలు కల్పిస్తుంది.

కమ్యూనికేషన్‌ చాలా అవసరం
ప్రతి వ్యక్తి భాగస్వామి తనను అర్థం చేసుకోవాలని, శ్రద్ధ వహించాలని కోరుకుంటాడు. ఇది  సహజమే అయినప్పటికీ, జీవితపు ఒత్తిళ్లు కుదురుగా ఉండనివ్వవు. మీ భాగస్వామి మనస్సును చదవడం అంత సులభం ఏ కాదు. ఏదీ బయటకు వ్యక్తపరచనప్పుడు మరింత కష్టంగా కూడా ఉండవచ్చు. అందుకే స్పష్టమైన, నిజాయితీగల కమ్యూనికేషన్‌ చాలా అవసరం.

వైవాహిక సమస్యలకు సంతానం పరిష్కారం కాదు
పిల్లల పుట్టుకతో సమస్యాత్మకమైన వివాహం సరిదిద్దబడుతుందని చాలామంది నమ్ముతారు. ‘ఒక బిడ్డ పుడితే వాళ్లే సరిదిద్దుకుంటారు’ అనుకుంటారు. కానీ ఇది ఒక పెద్ద అ పోహ. బలమైన సంబంధంలోనే బిడ్డ ప్రేమను పెంచుకోగలడు. కానీ పుట్టిన బిడ్డ విచ్ఛిన్నమైన వైవాహిక సంబంధాన్ని సరిదిద్దలేదు. తల్లిదండ్రులుగా ఉండటం ఆనందాన్ని కలిగించాలంటే, భాగస్వాములిద్దరూ సమన్వయం చేసుకోవాలి. నిబద్ధతతో ఉండాలి. భాగస్వామికి అవసరమైన సమయాన్ని ఇవ్వడానికి, అభివృద్ధికి కృషి చేయడానికి ఎప్పుడూ సిద్ధంగా ఉండాలి.

ఒకరి ఆసక్తులను ఒకరు గౌరవించుకోవాలి
సుమారు 60 శాతం మంది ప్రజలు ఉమ్మడి ఆసక్తులు ఆరోగ్యకరమైన సంబంధానికి దోహదం చేస్తాయని నమ్ముతారు. ఒకే తరహా అభిరుచులు ఉంటే కొంత వరకు సహాయపడగలవు. నిజానికి  ఒకరి అభిరుచులను మరొకరు గౌరవించాలి. ఆసక్తులు భిన్నంగా ఉన్నప్పటికీ, వాటిని ఎగతాళి చేయడం లేదా తోసిపుచ్చడం సంబంధానికి హాని కలిగిస్తాయి. మీ భాగస్వామి తనకు ఇష్టమైన విషయాలను మీతో పంచుకున్నప్పుడు ఆసక్తిగా వినాలి. దీని వల్ల మీ భాగస్వామికి తమ పట్ల శ్రద్ధ చూపుతున్నారనే విషయం అర్ధం అవుతుంది. మద్దతు ఇవ్వడం అంటే ఒప్పందం మాత్రమే కాదు, ఇది వాగ్దానం కూడా.

సహానుభూతి శక్తిమంతమైన సాధనం
చర్చలు, వాదోపవాదాలు సమస్యలను చాలా వరకు పరిష్కరిస్తాయి. అయితే, దీనికి బదులుగా మీ భాగస్వామి చెప్పుల్లో మీ కాళ్లు పెట్టి వారి దృక్పథాన్ని అర్థం చేసుకోవడానికి ప్రయత్నించండి. సానుభూతి అనేది దీర్ఘకాలిక, అర్థవంతమైన బంధాన్ని పెంపొందించగల శక్తిమంతమైన సాధనం. ప్రతి సంబంధంలో విభేదాలు ఉంటాయి. కానీ, సహనం, సానుభూతి వల్లే సంబంధం నిలబడుతుంది.